ED Ke Naam Par Vasooli Mamla: Vakil, DTO-CO Samet Kai Ke Thikano Par ED Ka Chhapa, Cash Baramad Hone Ki Soochna



Ranchi: Jharkhand mein Enforcement Directorate (ED) ne ek baar phir se karyavahi ki hai. Mangalwaar ki subah ED ki team Dhanbad aur Ranchi mein ek vakil, DTO, CO aur kai anya logon ke thikaanon par chhapemari kar rahi hai. Jaankari ke mutabiq, ED ne Dhanbad ke ek vakil ke saath-saath Dhanbad ke DTO Diwakar Prasad Dwivedi, Jai Kumar Ram, Prabhat Bhushan, Sanjeev Pandey aur Ravi naam ke vyakti ke thikaanon par chhapa mara hai. Yeh karyavahi Pandara police station mein darj ek FIR ke aadhaar par ki gayi hai. Chhapemari ke dauran bhari matra mein cash baramad hone ki khabar saamne aa rahi hai, halanki iski pushti abhi tak nahi ho paayi hai.

Aarop: ED Ko Manage Karne Ke Liye 5.71 Crore Mein Hui Thi Deal Zameen ghotala mamle ki jaanch kar rahe ED ko manage karne ke liye Kanke aur Namkum CO ke saath Dhanbad DTO par 5.71 crore rupaye mein deal karne ka aarop laga hai. Zameen vyapari Sanjeev Kumar Pandey ne Pandara OP mein vakil Sujeet Kumar ke khilaf mamla darj karaya hai. Sanjeev Pandey, jo Pandara ke niwasi hain, ne ED se jude ek case ko manage karne ke naam par Ranchi ke Pandara thana mein vakil Sujeet Kumar ke khilaf FIR darj karayi hai.

Sanjeev ka aarop hai ki Sujeet Kumar ne ED ki chargesheet mein unka naam shamil na karne ke liye kuch adhikariyon ke saath milkar paanch crore se zyada ki dhokhadhadi ki hai. Sanjeev ke mutabiq, Sujeet ne unhe bharosa dilaya tha ki wo unhe aur unke kuch adhikari mitron ko ED ke case se bacha lenge, aur unka naam chargesheet mein nahi aayega. Badle mein, Sujeet ne Sanjeev se croreon rupaye le liye. Lekin iske baawjood Sanjeev ka naam ED ki chargesheet mein aagaya. Jab Sanjeev ne apna paisa wapas maanga, to Sujeet ne 54 cheques diye aur apni car bhi diya paisa wapas karne ke badle mein. Sujeet ke saath ek agreement bhi kiya gaya. Iske baad, Sujeet ne bhi Sanjeev ke khilaf apaharan ka mamla darj karaya hai. Sujeet ke mutabiq, Sanjeev aur unke kuch sathiyon ne unka apaharan kiya aur 12 lakh rupaye vasoolne ke baad unhe chhoda.